Ímynd ímyndasmiða

Ég rakst á áhugaverða bloggfærslu hjá Ómari Valdimarssyni, þar sem hann gagnrýnir Jónas Kristjánsson fyrir að efast um heilindi þeirra sem fara í almannatengslabransann, sbr.

Blaðamaður þarf að vera heilsteyptur (hinir fari í almannatengsli).

Um þetta segir Ómar

Að gefa það í skyn að einstaklingar sem ekki eru “heilsteyptir” geti sinnt almannatengslum, er reginskyssa. Þessi tilraun til fyndni er í besta falli ósmekkleg, í versta falli alvarlegur dómgreindarbrestur gamla ritstjórans

Ég setti inn athugasemd, sem eftir á að hyggja var frekar tilgangslaust, þar sem hún var ekkert sérlega jákvæð og rímar væntanlega ekki við þá ímynd sem ímyndasmiðurinn Ómar hefur af störfum almannatengslara. En ég ætla að leyfa þessari athugasemd að standa hér, því hugsanlega langar einhvern að gagnrýna þessa skoðun mína, sem ég skal glaður verja.

Ég leyfi mér að túlka orð Jónasar þannig að hann eigi við að heiðarleikinn sé nauðsynlegur þáttur í fari blaðamanna en ekki þeirra sem vinna við almannatengsl, þar sem sá ímyndariðnaður gengur ekki út á að segja sannleikann, heldur að fegra hann. Í mínum huga verður einstaklingur sem fórnar heiðarleika sínum fyrir krónur og aura seint talinn heilsteyptur.

Þar hafið þið það.

Athugasemdir

[Björn Darri Sigurðsson, 12.3.2008 kl. 16:04]

Jæja, Ómar hleypti athugasemd minni að, það verður spennandi að sjá hvort einhver darraðardans muni duna í framhaldi af því.

[Hans Magnússon (IP-tala skráð) 12.3.2008 kl. 17:55]

Hann fer örugglega í mál við Jónas gamla.... og þig líka, ef þú verður ekki stilltur! ;)

[Björn Darri Sigurðsson, 12.3.2008 kl. 18:13]

Já, ég verð sko að passa mig að stíga ekki á neinar tær í þessum dansi :).

[Björn Darri Sigurðsson, 12.3.2008 kl. 18:27]

Ég hugsa að ég haldi athugasemdum mínum til haga hér, það væri soldið kjánalegt að falla svo fyrir einhverri almannatengsla-brellu í þessari umræðu, þ.e.a.s. að athugasemdir sem kæmu sér illa fyrir viðmælanda minn yrðu ekki samþykktar svo hann líti út fyrir að hafa átt síðasta orðið, mér finnst bara best að setja öryggið á oddinn í svona samskiptum. Ómar fyrirgefur mér vonandi ef hann hefur einfaldlega ekki verið í tölvulandi þessa síðustu tvo tíma. Ég sagði eitthvað á þessa leið nú síðast:

En svo að ég komi mér að kjarna málsins þá finnst mér óheiðarlegt að segja bara hálfan sannleikann, en er það ekki það sem almannatengslafulltrúar gera, upphefja hið jákvæða og gera lítið úr hinu neikvæða þótt hvort tveggja sé sannleikanum samkvæmt?

[Björn Darri Sigurðsson, 14.3.2008 kl. 19:05]

Sæll!

Nei, það er ekki meining mín að allir almannatenglar séu illa innrættir, heldur einfaldlega að þessi stétt sé tilvalin fyrir illa innrætt fólk þar sem í þessu starfi virðast engar raunverulegar kröfur vera gerðar um heiðarleika (eins og ég skil hann), það þýðir ekki að fullkomlega siðsamt og heiðarlegt fólk sé hvergi að finna í bransanum. Ég vona að þú sjáir muninn á þessum fullyrðingum, því hann er afar mikilvægur.

En ég skal fúslega viðurkenna að ég hef lítið sem ekkert álit á störfum þessarar stéttar og er þér ósammála um að þetta starf sé mikilvægt nema í frekar þröngu samhengi. Það sem ég á við er að þetta starf er mjög mikilvægt fyrir þau fyrirtæki sem þurfa á "bættri ímynd" að halda, en fyrir mig sem neytanda er þetta starf til þess fallið að blekkja mig (með því að draga hulu yfir hið neikvæða og upphefja hið jákvæða) og þjónar þar af leiðandi ekki mínum hagsmunum.

Kveðja,

Björn Darri